မန်စီးတီးအသင်းကွင်းလယ်လူ ဖိုဒန်အနေနဲ့
ကမ္ဘာ့အကောင်းဆုံးကစားသမားဖြစ်လာလိမ့်မယ်လို့
အသင်းဖော်နောက်ခံလူ ယာအိုကန်ဆယ်လိုက
ထောက်ခံပြောကြားလိုက်ပါတယ်။
ပေါ်တူဂီလက်ရွေးစင် ကန်ဆယ်လိုဟာ
အသင်းနဲ့ ၂နှစ်စာချုပ်သစ်ချုပ်ဆိုခဲ့ရာ
အနည်းဆုံး အသင်းမှာ ၂၀၂၇
နွေရာသီအထိ ရှိနေတော့မှာဖြစ်ပါတယ်။
၂၀၁၉ နွေရာသီက ဂျူဗင်တပ်စ်ကနေ
ရောက်လာတဲ့ ကန်ဆယ်လိုဟာ
နည်းပြ ဂွါဒီယိုလာလက်ထက်မှာ အကောင်းဆုံး
အနေအထားရောက်နေပြီး စီးတီးအသင်းရဲ့
တိုက်စစ်မှာ အားကိုးရသူဖြစ်လာပါတယ်။
သူက စီးတီးအနေနဲ့ နောင်နှစ်အနည်းငယ်
ကြာတဲ့အထိ ရာသီတိုင်းမှာ ပြိုင်ပွဲတိုင်းကို
အကောင်းဆုံးစိန်ခေါ်နိုင်လိမ့်မယ်လို့ ယုံကြည်နေပြီး
အင်္ဂလန်လက်ရွေးစင် ဖိုဒန်လည်း ကမ္ဘာ့အကောင်းဆုံး
ကစားသမားဖြစ်လာလိမ့်မယ်လို့ မျှော်လင့်နေပါတယ်။
”ဒီအသင်းနဲ့အတူ အောင်မြင်မှုရယူနိုင်လိမ့်မယ်လို့
အမြဲတမ်း ယုံကြည်ထားပါတယ်။ ကျွန်တော်တို့အသင်းမှာ
တောက်ပတဲ့အနာဂတ်ပိုင်ဆိုင်ထားတဲ့ ကစားသမားတွေ
အများကြီးရှိပါတယ်။ ဖိုဒန်ဆိုရင်လည်း တကယ်လို့
တစ်ချိန်ချိန်မှာ အကောင်းဆုံးကစားသမားဖြစ်မလာဘူးဆိုရင်တောင်မှ
အကောင်းဆုံးထဲတစ်ယောက်တော့ ဖြစ်လာနိုင်ပါတယ်”လို့
ကန်ဆယ်လိုက ပြောပါတယ်။ အသက် ၂၁ နှစ်အရွယ်ရှိ
ဖိုဒန်ဟာ ၂၀၁၉-၂၀ ရာသီက စီးတီးအတွက်
ပြိုင်ပွဲစုံ ၃၈ပွဲကစားပေးခဲ့ပြီး ၂၀၂၀-၂၁ ရာသီမှာတော့
ပွဲပေါင်း ၅၀အထိ ကစားခွင့်ရခဲ့ပါတယ်။
သူဟာ ပြီးခဲ့တဲ့ရာသီက စီးတီးအတွက် ၁၆ ဂိုးအထိ
သွင်းယူကာ အသင်းရဲ့အဓိကကစားသမားတစ်ဦးအဖြစ်
ခြေစွမ်းပြနိုင်ခဲ့ပြီး အသင်းကလည်း ပရီးမီးယားလိဂ်နဲ့
ကာရာဘောင်ဖလားချန်ပီယံတွေဖြစ်ခဲ့သလို ချန်ပီယံလိဂ်မှာလည်း
ပထမဆုံးအကြိမ်အဖြစ် ဗိုလ်လုပွဲအထိ တက်လှမ်းနိုင်ခဲ့ပါတယ်။